پوار وزیراعظم بن جائیں مجھے خوشی ہوگی : شنڈے

شولاپور ۔11 جنوری (پی ٹی آئی) مرکزی وزیر داخلہ سشیل کمار شنڈے نے ایک ایسا ریمارک کیا ہے جس پر کانگریس میں کئی قائدین کی پیشانیوں پر بل پڑسکتے ہیں۔ شنڈے نے آج کہا کہ این سی پی سربراہ شردپوار کو وزیراعظم کی گدی پر دیکھ کر انھیں خوشی ہوگی۔ مراٹھا کے طاقتور لیڈر کو انھوں نے اپنا سیاسی گرو قرار دیا۔ شنڈے نے مراٹھی روزناموں کے ایڈیٹرس کے ساتھ تبادلہ خیال کرتے ہوئے کہا ’’اگر پوار وزیراعظم بن جائیں تو مجھے بے حد خوشی ہوگی ، وہ میرے سیاسی گرو ہیں۔ میں ان ہی کی بدولت سیاست میں داخل ہوا‘‘۔ انھوں نے کہا کہ ہر ایک کی خواہش ہوتی ہے اور وہ 1992 ء سے کوشش کررہے ہیں۔ شنڈے کا یہ ریمارک ایسے وقت سامنے آیا جب کہ کانگریس کا اہم ترین سیشن 17 جنوری کو منعقد ہونے والا ہے جس میں پارٹی کے



نائب صدر راہول گاندھی کو وزارت عظمیٰ کے لئے کانگریس کی جانب سے امیدوار کی حیثیت سے پیش کرنے کی قیاس آرائیاں گرم ہیں۔ شنڈے نے کہا کہ اس بارے میں دورائے کی کوئی وجہ نہیں ہے ، یہ بات انھوں نے پہلے بھی کئی مرتبہ کہی ہے حتی کہ قومی پلیٹ فارم پر بھی کہہ چکے ہیں۔ انھوں نے کہا کہ پوار نے 1992 ء سے وزیراعظم بننے کی کوشش شروع کی تھی لیکن وہ دہلی کی سیاست کا شکار ہوگئے۔ یاد رہے کہ پوار نے 1999 ء میں سونیاگاندھی کے غیرملکی ہونے کا مسئلہ اٹھاتے ہوئے کانگریس سے علحدگی اختیار کی اور نیشنلسٹ کانگریس پارٹی (این سی پی) قائم کی۔ پوار نے حال ہی میں اعلان کیا ہے کہ وہ 2014 ء کے انتخابات میں حصہ نہیں لیں گے اور اس کے بجائے راجیہ سبھا کی نشست کے ذریعہ پارلیمنٹ میں اپنی موجودگی کو یقینی بنائیں گے۔